德甲歇冬期結束，拜仁慕尼黑喺上周五作客弗賴堡就憑射手羅拔利雲度夫斯基梅開二度包括喺補時階段絕殺，有驚無險以2:1反勝對手。弗賴堡喺開波四分鐘就有哈比拿入波，不過拜仁呢隊德甲班霸喺35分鐘就有羅拔仔接應杜格拉斯哥斯達開出嘅角球，窩利勁射入網，追成平手；而呢位28歲射手喺補時一分鐘再入多球，幫拜仁全取三分。拜仁目前以42分繼續排聯賽榜首。