【本報訊】港島延線開通，昔日舊區西營盤變「新蘇豪」，3年前落戶第一街社企「好好生活百貨」亦遭逼遷。「業主根本唔想傾」，小小內街大興土木，昔日車房變身咖啡店，改衫老店成歷史。老闆李燕儂與拍檔經營另類銀髮用品小社企，租約3月屆滿，她最不捨的是一班定時定候來打躉的老街坊。食足年半菠蘿包捱到收支平衡，又得由零開始。
記者：呂麗嬋
「人生在世，一定要做一件自己真正想做嘅事！」像李燕儂的創業故事大抵不罕有：儲了小筆錢，逼近女人三十，把心一橫，傾盡積蓄創業，專揀偏僻但平租舖位開荒，捱上軌道卻遇逼遷……「鬼叫我唔係李嘉誠個女咩！」新一代創業初哥，就連口頭禪都大同小異！「以前唔殺到埋身，冇切膚之痛，地產霸權原來冇想像咁遙遠」。
位於斜路的200呎地舖，又窄又長，勝在平租，一簽簽下3年租約，至3月14日到期，「上年10月已搵業主傾，一直無回音」。商界出身的她無怪業主，「地舖貴租唔使諗，會搵樓上舖，不過啱啱遇正過年，好多業主都睇定啲」。由網店到實體店，李燕儂大學主修數學和工商管理碩士，加國回流香港，曾任職多間銀行，拍檔則任職iBank資訊科技部，典型中環精英。
母中風坐輪椅 啟發開店
「喺銀行做人工唔低，一年廿幾日假，又有雙糧，如果嗰時生活好安逸，或者唔敢冒險諗創業」。人生環環相扣，銀行要跑數，李燕儂不用跑卻要「捽」。「你（分行同事）今季跑到100萬，唔該你下季再跑多少少」。無止境捽數，遇正工作要24小時候命的好友拍檔，兩顆疲憊的心一拍即合。「全球投資銀行都係佢啲客，個網絡一有事，一個電話，食住飯都要趕返公司處理」。名副其實「分分鐘幾十億上落」，壓力沉重。
「嗰時就諗，係咪要繼續過咁嘅生活？」工作遇樽頸，媽媽突然中風，出入倚靠輪椅。人生，原來總有限期。「我阿媽好貪靚，出事時先50幾歲」。生老病死無可避免，不接受還得接受，如何繼續好好生活才是大學問。向來孝順的她四出找復康產品，由香港醫療用品專門店到外國網站，成了半個專家。「喺香港，呢類產品主要為解決最基本嘅問題，賣助行架、輪椅，協助如廁餵食，有啲產品嘅設計，無時無刻提醒用佢嘅人：你係有殘障嘅」。
傳統市場認知是長者用品越平越好，毋須花巧美觀，小孩用品就再貴都有人買。生存與生活，是價值觀也是現實。「我覺得唔應該係咁，其實外國好多選擇，設計貼心又靚好多」。走訪同樣面對人口老化的台灣和日本，李認定這是香港未開拓的新市場。助人助己又有商機，便與拍檔齊齊辭工創業。
感謝街坊點醒 由守變攻
「我哋未做過生意，錢又唔係多，貨唔夠，門面大大隻字寫長者用品，奇奇怪怪」。引進日本製的放大鏡指甲鉗、來路手工動物頭的實木手杖，還有潮爆七彩老花鏡，針對新老市場。可惜走得太前，首月營業額僅數百，頭一年「食白果」食到飽。幸好老區勝在有人情味，一間奇怪小店出現，她又不恥下問，原本路過不相識的街坊紛紛獻計，「呢度好似街坊會，好多街坊買完餸，一定要過嚟傾兩句」。街坊甲指小店叫「長者」太趕客，街坊乙就提醒冬天賣太陽眼鏡不合時宜。
「掙唔到租惟有一味慳，慳到有啲病態，連宣傳單張都唔捨得印，午餐食3蚊個菠蘿包，真係太厭，就幫襯街頭嗰間良心燒味店，廿蚊個單拼飯包嘢飲」。轉守為攻是食了年半菠蘿包加單拼飯之後的事，「到處揾人傾，先知咁樣坐以待斃，死路一條」。
由全守變全攻，接洽海外生產商獨家代理、聘退休護士任銀齡大使主持講座、找本地設計師生產放大鏡頸鏈；以「待用券」概念，在航空公司的免稅雜誌「上架」，每售一條會經聖雅各福群會，送一條給有需要的老人家。轉捩點是以游擊方式將銀髮用品打進教協及百貨公司。李燕儂指「真係不停發電郵同打電話，雖然得一田成功，已係好開始」。
由捽數到自捽，千辛萬苦始換來認識和認同，更有社福機構聯絡她合作，上年中終達收支平衡，收入雖遠遠比不上打工時代，但她直言已對自己有交代，殊不知港鐵開通，漸見曙光的一盤生意只得逼遷。李燕儂笑指正物色新舖位，無懼由零開始，「地產霸權無處不在，都要面對，只係最唔捨得喺呢度班街坊」。