神奇隊長謝拉特上年11月宣佈退休，相信唔單止利物浦、英格蘭球迷，連好多其他球隊球迷都好唔捨得，不過二月謝拉特就會重返利物浦嘞，不過就唔係球員，而係教練身份。紅軍上周五官網宣佈，36歲嘅謝拉特會二月開始擔任青年軍教練，希望將紅軍青訓發揚光大。
謝拉特由七歲開始加入紅軍少年隊，球員大部份時間都貢獻畀利物浦，只係2015至16年去洛杉磯銀河轉戰美職，上年尾宣佈退休後，都傳過佢有唔同去向，不過始終心繫紅軍，都係返去利物浦。謝拉特話：「對我嚟講，就好似一個循環，又返到我嘅球員生涯起點，呢個唔係衝動嘅決定，我知道我嘅工作，為球隊有咩貢獻。今次係一個好機會畀我去學做教練，我亦都樂意向年輕球員傳授我嘅經驗、知識同理念。」
多條出路情歸紅軍
利物浦U21領隊恩格科普話同謝拉特見面後，就知道佢極之適合呢份工作，恩格科普仲話「謝四」其實有更多好選擇，包括評述員、一隊教練，甚至領隊，不過佢始終都想返利物浦。紅軍嘅青訓一向都幾出色，今季就有右閘阿歷山大阿諾特，如果謝拉特加入青年軍教練工作，未來可以有更多優秀產品出現。
紅軍被破主場不敗身
紅軍對史雲斯賽前就接連收到好消息，巴西中場菲臘比古天奴傷癒回復狀態，繼英足盃擊敗普利茅夫後，連續兩場正選，另外中堅祖爾麥迪比亦都解決同喀麥隆足總缺陣非國盃嘅問題，終於獲准上陣，不過今仗先做後備。紅軍上半場有唔少機會，包括中場拉爾拉拿倒掛，不過就射高，下半場更被天鵝前鋒洛蘭迪一腳一頭，一度落後0:2，好彩紅軍靠羅拔圖法明奴梅開二度，逼和2:2，不過到74分鐘又被基菲爾施古臣建功再次超前，最終利浦以2:3見負，主場不敗身被破。