一年前全世界都預計唔到嘅事情，昨日香港時間凌晨12時半至1點半在華盛頓發生，就係美國第45任總統舉行宣誓就職禮宣誓嘅竟然係紐約地產佬特朗普。
即日開始，特朗普先生就係特朗普總統，權傾天下，佢嘅一言一行，一舉一動，會影響全美國及全世界。香港人最應該關注特朗普之經濟政策及美中外交政策。此人以前全無從政經驗，搞政治無跡可尋，競選期間言行出位，出言不遜，傳媒、政敵、女人、黑人、移民（特別係墨西哥人）都得罪晒，本來估佢輸梗，點知對手希拉莉有電郵門之痛腳及無數次講說話出爾反爾嘅紀錄，連美國女選民都唔喜歡佢，於是特朗普輸了總選票，贏了選舉人票，得以登其大寶。
從香港角度，要睇特朗普今日之後，會否對中國採取強硬態度，為美中貿易赤字及南海建島問題，不惜放棄「一個中國政策」！特朗普可能以「一中」為籌碼，逼北京讓步，但北京則堅持「一中」為中美關係基石，唔係談判籌碼，唔承認「一中」在先，就乜都唔駛傾。特朗普會否去到盡，好似玩沙蟹咁，一味作大靠嚇呢？國務卿候任人泰勒森在國會誇誇其談，竟然談及阻截中國進入南海新建島嶼，想話打一場海戰乎？
中美關係將進入新時期，任何衝突都會衝擊香港金融市場，令人好唔放心。或者特朗普口硬手軟都唔定，佢攬住阿Jack（馬雲）講生意先係真面目。如果係咁，美國經濟又會點呀？現在已經知道，聯儲局理事會有大變動，特朗普之經濟顧問與貿易顧問皆是美國一流經濟學家（諾貝爾獎級數）睇唔起嘅人物，而且過往對中國無甚好感，在美國內部方面，奧巴馬之經濟遺產相當不俗，與2009年接下喬治布殊嘅爛攤子不可同日而語，但特朗普一定要自己威嘅噃，唔會只說不做，但如果佢真係推行所講嘅基建刺激政策與大幅度減稅，美國通脹必然上升，經濟會過熱，逼聯儲局加息，加完又加，金融市場唔波動先至奇。故此左度右度，2017年係充滿驚異，時好時壞嘅一年，北京要全副精神應付特朗普，對香港可能無暇兼顧，只求香港特別行政區唔好搞到社會亂籠就得嘞；2017年之香港新特首，咁講法，最緊要有親和力，得民意大多數支持，商界民生保持平衡兼且有經驗應付金融波濤洶湧嘅局面，先至會令到北京放心，如新特首係好打得係要強硬推行梁振英之製造港獨路線，煩親中央就唔好啦。