強國政策就真係好似無相神功咁好難捉摸，之前各中超球隊響應習大大嘅足球夢，紛紛向海外簽入頂級球星，好似上海上港就以破車路士球會紀錄6,000萬歐元，收購巴西中場奧斯卡杜斯山度士，不過強國好似擔心球會借簽外援乘機走資，開始嚴控，上星期四中國足協推出甚麼18條，包括球會至少用15%全年支出搞青訓外，又打擊簽字費等行動，仲用官媒講收購球星對中國足球冇幫助云云。日前國內就爆出上港因為外匯管制問題，無法支付轉會費，搞到奧斯卡要打回頭返倫敦，上港之後就發聲明，話奧斯卡只係返倫敦處理私人事務，呢個星期會歸隊，到時睇吓佢有冇現身上海，就知道收購交易會唔會爛尾嘞。
泰維斯帶埋19家人去上海
不過正所謂「有人辭官歸故里，有人漏夜趕科場」，加盟另一支上海中超球隊申花嘅阿根廷前鋒泰維斯，上周六就出席記者會，舉起佢件32號波衫。對於年薪達3,800萬歐元嘅傳聞，泰仔就話冇傳聞咁高，但就唔肯講實際數字，而佢竟然帶埋19個家人嚟上海，話呢度係第二個家喎。