政圈有一個歷久常新嘅傳聞令人議論紛紛，就係中聯辦主任張曉明係咪就快調走。有傳小明可能搞埋特首選舉就走，不過有人出席完前日中聯辦酒會，就覺得小明可能更快離開西環。
有出席酒會人士話小明一臉病容，台下好多人覺得小明氣色唔多好，而且似乎心事重重，再聽埋佢篇演辭，冇晒以往「太陽照常升起」嘅鬥爭味道，反而處處講以大局為重、互信互諒、紓緩化解社會矛盾、回歸理性務實同開放包容傳統，佢以往最鍾意嘅反港獨，亦只喺讚梁振英時提及，完全唔係小明風格。
呢個出席酒會人士估計，小明應該係上頭有壓力，所以先講和諧，令佢記得最近又有人同佢講小明好快調走，之前版本係搞埋特首選舉就走，但特首跑馬仔開始後，又傳佢提早調走。不過傳小明調走，冇傳咗一年都有大半年，佢都係聽住先，唔敢信到十足。