前財政司司長曾俊華今次參選特首，先有人吹風話中央畀紅燈佢，嚇班建制選委唔好提名佢；之後又話佢老婆仔女有外國籍，想藉此令中央覺得佢唔愛國。不過薯片叔叔睇得好開自嘲係色盲，似乎都聽過王菲嗰首一片灰濛都要過路嘅《色盲》。
被揭出世紙叫梅俊華
曾俊華噚日去商台接受訪問，主持陳志雲喺節目中段休息時間，播咗鄭融首《紅綠燈》畀鬍鬚曾，問佢對歌詞「明明綠燈，轉眼變成紅燈」有乜嘢感覺，明係玩佢傳聞俾人「紅燈」，點知鬍鬚曾自嘲色盲，睇唔到燈喎，仲係紅綠不分！
鬍鬚曾喺訪問又話，自己最鍾意人哋叫佢英文名John，早前有傳媒發現佢出世紙姓名係「梅俊華」，鬍鬚曾解釋父輩嚟香港時係姓梅，移民美國先改番原本姓曾，所以佢身份證係曾俊華，出世紙係梅俊華。至於點解會改姓梅？鬍鬚曾話當時情況複雜，好多申請去美國嘅人會用唔同嘅名，因為美國移民條例複雜，又話父親都冇詳細同佢解釋。
至於太太同仔女都擁有外國籍，會唔會叫佢哋放棄？鬍鬚曾話家人都係成年人，應該自己做決定，太太由幼稚園時代已經喺美國生活，仔女都喺美國出世，但認識好多「好愛國愛港」嘅人士，都有親人持外國護照，認為唔可以因此決定一個人愛國與否，而且屋企人已經回港30幾年，仔女仲喺香港住，咁佢哋係咪愛國愛港呢？最好等大家評論喎。
李八方
mailto:[email protected]