是上帝之手，幫梁特競選承諾「基本全部落實」的吧，否則，就是靠神蹟，真神顯靈，叫梁特唔使哽咽，只要及早拜神，就唔使粒粒皆辛苦啦，stupid。
已經清袋的施政報告來到最後一鋪，無謂踢爆男主角繼續呃人的伎倆out咗。江湖規矩，你情我願，呃都要有人肯被呃嘛。這個，包括鄭蛾嗎？否認自己「屁股指揮腦袋」，喔，有邊個咁蠢會承認自己天生異稟「腦屎忽」！否認歸否認，事實勝反口，鄭蛾埋班後，為官三十年好打得的身段，產生巨大進化，不妨自辯是受到緊密夥伴的洗腦影響，人云亦云，老闆永遠是對的。到掙脫心魔參選，脫胎換骨，飛蛾撲的不再是火咁笨，哎，講真，從來無講過會延續他的路線，因為我跟他是兩類不同的人！畫公仔畫出腸，斬纜！反枱！市民睇到疑似無間道N集。擺脫了變態老闆的忠心女管家，身影刻意嬌小，黑面小蛾變粉Q小雞，是競選工程中的必然變妝。當市民剝住花生，唔覺意坐返張舊摺凳睇有擔當的親民騷，就是地下黨員打茅波對財儲上下其手的絕妙時機。趁回歸20年大慶，新班子派錢呃住like先。今次派九千，用腦袋賭吓梁特，有銀，唔要？