隔牆有耳:去記招買薯片?小超:路過咋 - 李八方

隔牆有耳:
去記招買薯片?小超:路過咋 - 李八方

特首選戰開鑼,本地一班大孖沙可能怕落錯注,仲未表態話撐邊個。好似長和系主席李嘉誠咁,上屆揀豬唔揀狼,而今次有唔少人都估緊,佢到底揀薯片、奶媽、葡萄定胡官,一有乜嘢風吹草動,啲風吹到洪洪聲。
鬍鬚曾前日喺中環冠君大廈宣佈完要跑馬仔嗰陣,超人之子長和副主席李澤鉅就被影到喺附近花園道嘅停車場搭車走,唔通誠哥搵個仔出去買薯片?
長實發言人噚日即刻出嚟話冇啲咁嘅事,實情係長和總部長江中心個停車場有兩邊出口,特首選委之一嘅李澤鉅收工嗰陣趕住去中聯辦酒會,咪揀花園道嗰邊出,冇咁塞車咁話。
嚟緊又到一班大孖沙啲公司業績會,到時咪坐定定、食住花生睇戲囉,得佢哋至有票投㗎咋。