新任政務司司長張建宗噚日上商台節目，主持志雲大師向佢求證一個江湖傳聞，問佢係咪咁多年嚟都唔放假。估唔到做咗咁多年勞福局長嘅佢大方承認，話離開公務員系統轉做問責局長時放棄咗280日假，「夠（買）一間丁屋」，而做局長後9年幾以嚟都未放過一日年假。到近日轉做政務司司長，同事通知佢所有局長年假都會被取消，佢仲霸氣咁話：「你講我知都冇用，我都唔放假！」
張建宗話，自己一直爭取勞工權益、為勞工權益着想，都明白假期同作息嘅重要，但自己鍾意工作，從來唔放年假咁話。至於講到嗜好，佢話自己最鍾意睇新聞，一早起身已經睇BBC、CCTV同本地新聞。
問到佢係咪除咗工作冇其他嘢做，佢話自己愛家庭樂，會行山、飲茶。至於係咪冇去過旅行，佢就話一般都係公幹去內地多，「民生主打所以多留港」。