早排立法會喺建制派支持下，通過將對熱血公民議員鄭松泰倒插國旗同區旗嘅譴責動議，交由調查委員會處理，內會噚日選委員會成員，結果調查委員會正、副主席同5名委員，全部由建制派議員做晒。不過今次唔係建制派要霸晒，而係民主派唔想同佢哋浪費時間查「小學雞」行為。
其實建制派想拉一、兩個民主派議員入去做花樽，好似劉國勳提名民主黨黃碧雲加入，黃碧雲即刻話不接受提名，因為民主黨一早講清楚，議會時間好珍貴，唔應該浪費時間查小學雞行為，之後民主黨尹兆堅、香港眾志羅冠聰、公民黨陳淑莊、會計界梁繼昌、教育界葉建源等都全部拒絕加入。鄭松泰同意民主派杯葛，話以免加入咗令人覺得調查好公平。