立法會財委會噚日續議問責官員加人工，泛民批評高官加人工唔合理，民建聯蔣麗芸護官心切，不滿泛民重複提問，竟擺人哋父母上枱辱罵，「你哋阿爸阿媽都睇你哋唔順眼啦，話畀你聽！仔都生咗出嚟吖嘛！咁冇辦法吖嘛！」
民主黨許智𥧌睇唔過眼，反諷元秋早前潑婦罵街式議政嘅片段喺網上瘋傳。主席陳健波話佢言論冒犯，唔准再講，許堅持指元秋係潑婦罵街，黨友尹兆堅幫拖，要主席先裁決元秋出言侮辱。元秋即場發難，但先叫錯「尹志堅」，又冇望住主席發言，「潑婦罵街？就係你哋民主黨黃碧雲！」講完即刻鬆人。陳健波話許智𥧌行為不檢，要佢離開會議室，泛民即刻包圍保安員阻止。長毛話潑婦罵街係成語，點解唔講得，其他泛民都質疑主席雙重標準。