巴塞隆拿喺西甲最怕邊隊？未必係皇家馬德里，答案可能係皇家蘇斯達。周四西班牙盃八強首回合賽事，巴塞作客出戰皇蘇，賽前已經接近10年冇喺呢個阿諾埃塔球場贏波，結果靠尼馬入12碼，加上美斯有球證照住唔使被逐離場，破魔咒贏1:0先拔頭籌。
尼馬奠勝美斯險領紅
巴塞上次作客贏皇蘇係07年五月嘅事，當時美斯只係19歲，仲未着巴塞10號球衣。自此之後巴塞一直未再喺阿諾埃塔贏過，八場波三和五輸，今季西甲首循環都幾乎輸波收場，係靠美斯扳平逼和對手；到周四西盃返嚟阿諾埃塔，教練安歷基都唔敢怠慢，中前場排出最強陣容出戰，「MSN」加埋中場恩尼斯達、布斯基斯同拿傑錫迪。巴塞喺上半場21分鐘先開紀錄，尼馬引球殺入禁區俾阿列斯艾路斯當度侵犯，12碼由佢親自操刀，射入全場唯一入球。
教練安歷基賽後話總算鬆口氣：「作為球員我曾經喺呢個球場贏過，𠵱家總算以教練身份贏番次。皇蘇喺主場一直踢得好出色，要喺呢度贏真係唔易。」美斯跨年連續七場比賽入波嘅走勢終於斷纜，佢喺今場波唔使領紅都算執番身彩。美斯喺上半場已經領咗面黃牌，易邊後五分鐘涉嫌阻住伊拿拉文迪快開罰球，但球證冇示意要再畀牌，搞到皇蘇球員好不滿。另外，恩尼斯達喺場波受傷退下火線，預計周日作客伊巴場西甲都唔踢得。
易容李華度落場玩晒
班現役巴塞球員爭氣贏波，嗰邊廂昔日球星李華度喺周三探完班，講笑話要加入MSN組成MRNS組合後，日前再玩大啲。
呢位前世界足球先生，喺巴塞訓練基地參加練習賽，比賽兩隊由巴塞助教、體育記者同埋社交網名人等組成，李華度先秘密進行特技化妝，戴埋假髮改頭換面，仲改埋名叫羅拔圖施華，所以佢由後備入替嗰陣都冇人知佢係乜水，但落到場球技就超晒班，對手完全攞唔到佢個波。李華度喺賽後先揭開真面目，大家知道原來同位超級球星同場玩過，全場拍爛手掌。