北京空氣質素惡劣，世人皆知，北京市委領導想爆頭也找不出辦法。最佳方法，經實驗證明，就係禁止工廠開工，呢一招過往屢試不爽，2008北京奧運，2015年9月3日北京大閱兵期間，為表顯北京藍天白雲一面，皆暫禁工廠開工，去年杭州主辦G20峰會，同樣照辦煮碗，環保效果非常理想。
但偶一為之則可，長期如是嘅話，咪窒礙經濟發展，唔啱1949年以來中國共產黨計劃經濟嗰一套噃，中共成日話要經濟改革，習近平上台後兼任多個「深化改革小組」主席，試問上任近五年來，喺邊方面有過真正改革呀？答案係：我地外間凡人睇唔到皇帝新衣在那裏。
怪只怪毛澤東好大喜功，登上北平故宮城門之後，就要大事變更，拆城門、拆城樓，在文化古城引入鋼鐵、發電等重工業，開始污染整個北京城，1980年左右，中資林帶左丁山去北京參觀鋼鐵廠，望見啲黑煙噴入天空，灰黃黑三色兼備，已經心驚驚咯，中貿林當年去推銷歐洲製造嘅工業「除塵器」，好似去到貨，有國企買，現在睇番轉頭，原來只算係杯水車薪，北京空氣污染直情係毛澤東式大躍進。
今天不少人歸咎北京汽車太多喎，於是北京市嚴限發出車輛登記牌、要抽籤，買電動車就幾乎逢抽必中。但now TV報導，北京現有六萬架電動車，因充電站不足，揸電動車非常不便，富翁可以在獨立屋設置充電器啫，普通市民可能連車位都要爭，一定要去充電站，大排長龍；點解唔開多啲充電站？now訪問北京理工大學教授胡星斗，教授話北京難有吉地，充電站佔用土地問題就來了。唉吔講到尾，又係同香港一樣，地皮有價，興建公屋可得到政績，興建新樓可賺大錢，用來做了電動車充電站？不合乎經濟原則啫！自由市場經濟學家有辦法嘅，就係將一啲土地規劃充電站用途，公開招標，價高者得，經營者以市價買入地皮開辦充電站。如此一來充電費用除電費外必然包含地價在內（即是話：充電費可以比電費高幾倍），到時電動車每月嘅充電費充份反映土地成本，可能貴過加油費！但可惜呢，政治上未必可行，即使北京市政府無須民選，亦驚俾人民痛罵也。如透過行政命令收地，限作國營充電站用途，收費不反映地價，必然引誘到大量車主轉用電動車，令耗電量大升，明益電力公司，亦增加發電排放量。請問你要點揀？