食正特首選舉熱潮，工黨今年年宵推出限量200套、每套賣188蚊嘅「特首跑馬仔」Board Game，畀一眾無得投票嘅市民食住花生體驗小圈子選舉荒謬。遊戲有唔少指示卡，抽中擦中央鞋就可以前進，抽中UGL醜聞、畀「太公報」抹黑就退後，設計抵死。
遊戲又有一紅一綠骰仔，要擲到綠骰點數大過紅骰，參選人先可以起步參選。有鬍鬚嘅工黨議員張超雄，噚日就用鬍鬚曾棋試玩，點知粒骰擲極都係紅大過綠，起唔到步，都咪話唔邪。
工黨仲製作幾百件「DQ DAB（Democracy According to Beijing）」T恤，仲有「立法會is being deleted」咖啡杯，市民可以去維園78號檔入貨。