人氣極高嘅前財爺曾俊華宣佈選特首之日，對反建制陣營嚟講，堪稱「全城倒奶日」，肯肯定會全力十卜薯片叔叔入閘，力抗西環加持嘅奶媽林鄭，挾民意直奔特首寶座。
而喺咁關鍵嘅一日，立法會議事廳內竟然有奶媽同CY同場現身？話說被視為挺唐陣營嘅兩位經民聯議員，地產建造界石禮謙同金融服務界張華峰，一度攞住手機喺議事廳內自拍，石禮謙仲笑笑口；而背景呢，就係一張抗議林鄭同CY嘅黑白肖像紙牌喎。唔知以此男、女版CY做背景selfie，係乜玩法？只見坐正喺紙牌前嘅新民黨葉劉淑儀同容海恩，就一臉無奈，唔通覺得被邪住，唔多老利？