原來除咗新民黨葉劉淑儀，民主思路召集人湯家驊都成為新跑道，幫新人起機。曾經係民主思路成員嘅李律仁同劉培榮，盛傳喺林鄭競選辦幫手，而曾俊華噚日登場嘅競選班底亦有民主思路原總幹事袁彌昌、即係人力前主席袁彌明嘅哥哥，估唔到湯狀身邊嘅才俊，各自被不同陣營睇中。
八方問過袁彌昌，佢話已辭任總幹事一職，引述湯狀同佢講，搞完選舉可以返番去幫手。咁妹妹袁彌明支唔支持？佢話梗係有同屋企傾過，似乎覺得薯片都係比較可以支持嘅候選人。
至於冇票嘅湯狀，噚日就到咗林鄭競選辦同對方會面，佢話係代表民主思路嚟討論有關特首選舉論壇嘅事，直指組織內部意見不一，有啲人撐薯片、有啲人則係林鄭粉絲，而佢個人則會了解所有參選人政綱之後先再決定。