「過往數十年吃得太多鮑魚。」德國寶董事長陳國民笑說，「以前覺得食鮑魚有種虛榮感嘛。」你數得出煮鮑魚耍家的飯店，他全部都去過無數次。他喜歡吃又愛煮，向不同師傅討教後，最終鑽研出最適合自己口味的做法，以後自己鮑魚自己煮，「有人教蒸，有人就話要浸發一星期，其實最緊要溏心、夠腍和入味而已。」好客的他，每星期最少宴客三次，鮑魚是他的指定菜式，收藏乾鮑亦成為他的興趣。
「這個做法很簡單，是個就算剛學烹飪，都可以掌握到的鮑魚食譜。」他的秘訣共有四個，分別是鮑魚浸透後要汆水，可以清除鮑魚殘餘的雜質；燜煮鮑魚時，肉類可隨意擺放，無分次序，只要記緊水份要蓋過鮑魚，不要讓它們氧化變黑。調味料不要急於用，燜的時侯讓鮑魚吸收肉類的香味。最後，鮑魚煮好後用真空袋裝好，跟鮑汁分開放，然後放入冰格儲存最少兩日，會更入味且溏心效果會更明顯。鮑魚儲存得好，他說放一年慢慢食亦可。
材料：
30頭鮑魚 1斤
老雞 半隻
唐排 1斤
雞腳 1斤
金華火腿 4兩
燒鴨頭 1隻
赤肉 半斤
瑤柱 兩粒
調味料：
蠔油 適量
生抽 適量
老抽 適量
冰糖 適量
生粉水 適量
做法：
1. 鮑魚用清水浸泡2天﹐每天換水。
2. 鮑魚用清水放入「全能電飯煲」用「湯」功能或用壓力煲煮25分鐘後取出，把水倒掉。
3. 清理腸臟及清洗鮑魚。
4. 把老雞、金華火腿、唐排、雞腳、赤肉及瑤柱燒鴨頭﹐於「全能電飯煲」或壓力煲內加入生油爆香﹐加入紹興酒後放進清水，之後加入鮑魚，煮30分鐘。煮好後讓鮑魚留在煲一晚。
5. 取出後﹐用手輕輕按壓每一鮑魚。如感覺有部份鮑魚不夠腍, 便要繼續煮15分鐘至鮑魚腍透。
6. 燜好的鮑魚隔汁，用真空袋包好，鮑汁放進密實袋分開放進冰格待用。
7. 宴客時，先用鮑汁將鮑魚翩熱，上桌前再用蠔油、生抽、老抽、冰糖調味。最後用生粉水打茨﹐即成。
貼士：煮和加熱鮑魚時，水份都要覆蓋鮑魚表面，以免鮑魚氧化變黑。
記者:吳宛蔚
攝影:周芝瑩
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily