杜如風「8萬8日本團」成為熱話，東瀛遊（6882）執董禤國全噚日講開，打趣話佢哋明星團就冇喇，不過美食、攝影團就由2009年已經開始搞，最貴嘅團要18.2萬銀！
呢個貴過杜如風團超過一倍嘅西班牙兼法國美食團，由禤國全帶隊，舊年10月出發，除咗坐商務機位同住五星級酒店之外，仲搭一次私人飛機，又食12間米芝蓮食府，食足24粒星，夠晒豪。
禤國全話，呢類特邀團只係畀特選顧客，點樣成為特選顧客？禤生沉思幾秒，然後話「你都可以去counter問吓有冇」。
今年佢打算帶番10團，其中一團係4月出發去名古屋，團費4.5萬至5萬蚊不等，會帶團友去新海誠新作《你的名字》嘅取景地方——飛驒市，原來禤生都係最近坐飛機先睇套戲，大讚新海誠畫功好。