咩叫偷雞唔到蝕渣米？睇吓特首梁振英就知嘞！佢日前喺任內最後一份《施政報告》嘅記者會上面，突然向前財爺曾俊華、即係若然佢唔棄選特首嘅最大勁敵翻舊賬，暗批薯片叔叔2011年亂咁派6,000蚊，其間講到自己都冇攞嗰6,000蚊，但卻被網民踢爆，佢當年話過捐畀慈善機構喎，咁即係講大話啦，梁特噚日回應時直認係捐咗，但借自己咁都唔記得，死撐證明筆錢唔應該畀佢喎。
其實網民喺梁特話冇拎嗰6,000蚊後，已經即時踢爆，2011年時任行會召集人嘅梁振英，曾經話會將呢6,000蚊捐畀關注大陸沙漠化嘅團體「寸心行動基金」。
戰鬥格永遠冇錯
噚日朝早喺電台節目中被問到呢件事，梁特回應，其後經朋友提醒先至記得款項已經捐出，「嗰6,000蚊捐錢嗰樣嘢呢，如果我當時真係捐咗錢，你提番我先知，噚（前）日都有朋友send咗text message（短訊）畀我話：『你真係捐咗錢喎』」。
但梁特首永遠都冇錯㗎嘛，呢個係佢特質，無論連唔連任應該都唔會變，所以佢繼續死撐：「說明唔應該畀我，唔應該入落我袋」，繼續一副戰鬥格。
八方噚日有趁機喺記者會問埋其他司、局長，當年又有冇拎嗰6,000蚊，包括政務司司長張建宗、食衞局局長高永文、財庫局局長陳家強同勞福局局長蕭偉強，張建宗就一併代回答，因為涉及私隱，所以唔會回應，果然好有CS風範。
李八方
mailto:[email protected]