早排碧桂園（2007）首席財務官（CFO）吳建斌辭職，放棄500萬年薪，走去攝影同寫作，大家對此半信半疑，噚日公司舉行春茗，總裁莫斌爆料話，吳建斌真係鍾意寫書，埋手寫緊有關碧桂園嘅書，趕今年出版㖭呀。
莫斌話當年前CFO伍綺琴走後，佢成功向中海外挖角，搵到吳建斌過檔，但就有條件，首先係吳建斌只做三年，二係要畀佢寫碧桂園。
話咁快三年之約已滿，對方有追求都要放人，莫斌話，信得過吳會如實咁寫，但佢都同對方約法三章，涉及商業機密、個人隱私都唔可以寫，怕有乜甩漏，變咗「矛頭對準我，要了我的命！」
至於接替做CFO嘅伍碧君，莫斌話一早睇好伍碧君，但對方表示「只是個女人，不想太大壓力」，今次係洗腦洗足七年先逼到佢上位。
伍碧君其實加入碧桂園12年，由上市湊起，好多投資者都識佢。佢話，當年伍綺琴走，原先打算由佢接任，只係當時股價波動，佢又唔係好出名，所以公司向外求，家陣坐正一切如常，大家唔使擔心咁話。