周日（22日）重頭戲當然係指第九場四歲馬系列嘅頭關經典一哩賽，而今日（19日）馬會正式出咗呢項大賽各駒嘅排位表。
喺賽馬世界入面，賽駒排得檔位屬於好或差已經直接影響該場嘅最後賽果會係點。尤其喺呢類高手雲集嘅大賽之下，檔位可能就係勝負嘅關鍵，所以我哋同大家分析一下，今場經典一哩賽邊匹賽駒已率先佔得先機。
查看數據，近三季田草A欄1600米賽事嘅最高勝出率原來唔係1、2檔，呢兩個檔位只得5.13%及10.26%，所以今場排得1檔大摩馬房嘅「共創更好」同埋2檔沈集成馬房嘅「四季旺」相信喺呢項數據底下難以有咩作為。
而最高勝出率嘅檔位就係屬於3檔，有成12.50%，而今場排得3檔的賽駒為告東尼馬房的「勁哥兒」，且看呢匹戰馬會否按數據咁爆冷勝出呢項大賽呢，而其次最高勝出率為11檔的大摩馬房的「人民武士」，也有10.53%。
而今場焦點馬告東尼馬房的「巴基之星」抽得9檔，勝出率也有不錯的10.26%；而大摩馬房的頭號領軍馬匹「鷹雄」抽得6檔，大家唔好以為呢個檔位靠近內欄，當日形勢會較利好，但有項好邪嘅數據依附住呢個檔位，原來近5季喺未贏過田草A欄1600米，你都未話唔邪，唔知呢匹在港一出即勝嘅昆士蘭打吡冠軍能否克服呢個咁邪嘅數據呢，我哋一於拭目以待。