朱古力除咗可以拎去拜年，仲可以𠱁情人，農曆年未到，有商場就已經準備定情人節活動。男士如果想送朱古力，又唔知對方鍾意咩，可以去睇吓「情·尋朱古力」活動，因一張240元朱古力通行證，裏面有12個電子金幣，可到場內10間朱古力店兌換指定朱古力，總有一款啱另一半口味。
至於港女最鍾意乜口味？有朱古力店負責人就同八方講，係70%可可朱古力，貪健康啲，無咁甜又唔會太苦喎。
一張通行證除開每個電子金幣約20元，一個幣已經可以換一粒價值20元以上嘅朱古力，參與店舖包括Godiva、The Peninsula Boutique、Venchi及zChocolate等。仲可以打印一張朱古力情書同購買限量版「Eternity」朱古力雕塑，再捐200元予香港血癌基金，就可換領白朱古力鑽石戒指雕塑。活動即日至2月19日於海港城舉行。