今年元宵佳節同西方情人節只係相隔3日，為慶祝佳節，康文署喺文化中心露天廣場搞咗個綵燈展，以「桃花池畔鳳求凰」做主題，祝天下有情人終成眷屬。
負責今次綵燈展嘅設計師鄧崇放用「鳳凰」做主題，迎合雞年之餘又浪漫。鄧生話，鳳同凰造型嘅花燈各自放喺池嘅一方，鳳飛過祥雲拱門去求愛，寓意市民都可以覓得所愛。佢仲話今次綵燈展最特別嘅就係個拱門，用咗LED彩燈加強現代感之外，市民仲可以走去拱門底，感受被桃花包圍嘅感覺㖭！綵燈展由1月20日至2月19日，每晚6點準時亮燈，直到晚上11點。
除咗綵燈展之外，仲有三場元宵綵燈會將會分別由2月10日至12日，晚上7點30分至10點，喺荃灣沙咀道遊樂場、香港文化中心露天廣場同北區公園舉行。到時唔只有綵燈，仲會有工藝師傅示範紮花燈同變臉表演㖭！康文署發言人話，4個綵燈會總共使咗335萬，預計會有59萬人次觀賞。