曼聯上季靠強勁嘅商業收入，加埋收咗5.15億鎊（約49億港元），打破皇家馬德里連續11季嘅壟斷，登上上季球會收入榜嘅榜首（見附表）。英超繼續強勢，喺頭20名當中，有八隊來自英超。
八支英超隊入前20名
德勤每季都會出一個球會收入榜，「銀河艦隊」皇馬已經霸咗第一名11季，但喺日前公佈嘅15/16球季收入榜，佢哋終於讓位，仲一下子跌落第三，由紅魔坐上榜首。雖然曼聯轉播收入1.4億鎊，唔夠皇馬同巴塞嚟，不過，紅魔喺商業開發方面真係領先其他球會成條街，上季商業收入2.72億鎊，佔咗總收入5.15億鎊嘅超過一半。雖然曼聯呢季冇歐聯踢，轉播收入肯定下降，但德勤話紅魔商業收入增長好勁，估計佢哋下年仲可以坐收入榜榜首，收入維持喺五億鎊以上。巴塞同皇馬喺個表入面嘅收入係一樣，但四捨五入前，巴塞嘅收入係多皇馬少少，所以升上第二。英超仲係最賺錢嘅聯賽，有八支英超隊打入收入榜前20名，除咗big 6之外，韋斯咸同上季冠軍李斯特城成功上榜。
我求大俠覺得曼聯嘅收入話唔定仲計少咗，因為有人穿櫃桶底。曼徹斯特法院近日審緊單案，有七名曼聯員工喺一場於奧脫福舉行嘅欖球賽中「落格」。呢七個人係球場入面負責賣熱狗同漢堡嘅小食部員工；曼聯方面指，球場內嘅攝影機影低佢哋落格，涉及金額約5,000鎊。