有賭未為輸，何況都未到入閘關鍵期，就算被俾人睇死，都冇理由咁早放棄，所以退休法官胡國興繼續出動，四出約見選委睇吓可唔可以創造奇蹟，前晚就同會計界嘅IT vision選委團隊會面，雙方有良好交流。
原來前日見選委有個小枝節，就係因為嚴重塞車，令胡官遲到咗。
遲到梗係令人急如熱鍋上嘅螞蟻，胡官喺佢facebook透露，當時客𨋢啱啱上咗去，為免在場嘅選委久等，所以搭有閘嘅貨𨋢上樓，勢估唔到連搭𨋢都悟出跑馬仔玄機，佢嘅帖文話：「拉閘唔容易，要成功入閘，當然要親力親為，有擔當都要識拉閘！」兼且hashtag「成功入閘」、「白金升降機」等，一次過寸爆埋CY嘅擔當論，呃like力度直逼薯片叔叔。