特首梁振英任內最後一份施政報告，對於港人而言相信係好消息，因為肯肯定下年呢個時候唔會再聽到佢喺立法會宣佈施政報告。既然係CY告別作，身邊人梗係要瞓身支持，八方發現噚日會議廳，至少有兩個人好專心咁聽CY宣讀報告，一個係資深梁粉陳玉娥，雖然同楊岳橋有段霧水「娥頸橋之戀」，但佢對CY嘅關心始終都係冇變嘅，依舊以獨特造型到場聽偶像發表演說。
至於另一個坐定定嘅自然係梁太唐青儀啦，佢噚日再次以一身龍蝦打扮示人，鮮紅色長裙襯黑色長褸，坐喺VIP席正中間，由鄭耀棠、林煥光等行會中人傍實。
中場休息時段，梁太都要周圍行舒展下筋骨，佢仲行咗入立法會嘅觀景廊；到完場時，佢就快步離開，冇同傳媒分享對另一半嘅告別作有乜感想噃！