香港樓市真係可以話全球十大不解之迷之一，當普羅市民怨樓價貴到離譜，但唔理邊度新盤一出又大把人搶，而且記者又總係訪問到啲父母，揚言拎幾百萬幫子女上車云云，最近一單個老竇仲好自豪咁話個仔識投胎㖭。喺小弟嘅認知，「好仔不論爺田地」，以往香港人都對自食其力嘅後生仔高度讚揚，唔知幾時開始老竇對生個二世祖出嚟竟然都沾沾自喜。
小弟一向對曼城領隊哥迪奧拿（圖）印象麻麻，佢過去贏過無盡錦標，一來帶嘅巴塞隆拿同拜仁慕尼黑，本身已經係勁旅，二來球隊都留番唔少遺產畀佢。坦白講，哥帥今季接手曼城，前朝領隊比歷連尼都留番一手好牌畀佢，阿古路、大衛施華等，都唔知係幾多球隊夢寐以求球員，最重要資產係奇雲迪布尼；戰友咖喱讚揚迪比利，講真比利時呢幾年真係人才輩出，25歲嘅迪布尼跑、傳、射皆能，亦都冇因為高身價、高人工變得懶散。而且亦都多功能性，出身打右翼，為戰術需要打左翼、進攻中場甚至防中都得，之前阿古路受傷，哥迪奧拿直頭安排佢打「假9」前鋒，一樣踢得掂，總好過哥帥喺切爾達搵埋啲洛尼圖返嚟。
富不過三代，睇嚟哥迪奧拿就真係威不過三隊，隨住潮流改變，哥帥仲係只識控控控，同世界脫節，迪布尼、阿古路喺曼城都係浪費緊天賦，一係走人，一係就換人，曼城真係考慮吓哥帥仲適唔適合英超。
文：牽牛