今晚夜馬跑沙田泥地，一開場又見雷神莫雷拉展示早糊王本色，頭場五班1200米佢騎方嘉柏馬房「喜得龍」於5檔順利起步，就此貼欄一放到底贏2.25馬位，此駒單Win乃2.8倍大熱，組合獨贏A1派16.5元。
四歲馬「喜得龍」賽前九戰一季八落第未贏過，上仗於泥地一哩由田泰安跑第三，今次縮程唔轉跑道，配搭換上莫雷拉，人馬季初曾合作於泥地短途跑第五輸近。呢勻故劍重逢順利由頭帶到尾，此駒開齋姿態十分輕鬆，反映本身已於泥地搵到新出路。
方嘉柏的兒子亦有入場打氣，一齊拉頭馬。方嘉柏說：「『喜得龍』近幾場已見進步演出，上場在一哩都所負不遠，今場縮程跑1200米更合，我有信心牠下仗升上四班仍有競爭力。『喜得龍』生得較細小，我希望牠能夠長肉，增加體重，牠如果可成功增磅的話，應會有更佳表現。」
方嘉柏馬房復蘇，已連贏兩個賽日共取三Win，今勻同時係方廐新一年首勝泥地，而雷神亦累積連勝33次賽事未斷纜，再破個人保持的香港賽馬紀錄。
今場開出熱頭大冷腳，二至四名順序由三匹冷馬瓜分，「駕迅」、「幸運贏贏」及「多多囍」，四重彩派44萬幾。其中季軍「幸運贏贏」是120倍馬，單是位置派彩已高達220元。