農曆新年香港好多地方都有年宵市集，第12年舉辦嘅apm年宵夜市就喺噚日起一連10日舉行，年廿九同年三十晚仲會通宵開放。今年場內分5大主題，有明星潮流快閃店、本地潮流設計區、學生創業場、搞笑賀年精品同環球潮流輕食，貨品成有1,500種，仲首次引入藝人陳敏之嘅手工曲奇、美國芝加哥大熱爆谷Garrett同德國熊仔軟糖。
要支持本地學生創意，學生創業場內就有一班由中學及大專院校學生設計嘅得意雞年產品，包括Pop-up揮春、巨雞暖手蛋攬枕同潮語紅van車牌匙扣。新地（中國）董事馮秀炎話，apm仲會限量推出1蚊雞年福袋，預計年宵夜市可以為商場帶嚟380萬人流，較去年升10%至15%，預計商場營業額可達1.3億元，較去年升一成。