今晚沙田泥地夜馬，練馬師方嘉柏先聲奪人，頭場佢搵雷神贏完大熱門「喜得龍」未夠喉，第二場五班1800米隨即以柏寶落飛冷門「糖黐豆」再下一城，兩駒一放一追一熱一冷先後勝出，方嘉柏就此包辦第一口孖寶。當中「糖黐豆」季內初配柏寶即贏，單Win及組合獨贏A3分別派128.5及30.5元，馬兒今季已三捷。
六歲馬「糖黐豆」好使好用，堪稱低班台柱新五班馬王，至今服役累積五捷，包括四勝谷草1800米及今場泥地1800米，田草1800米亦一戰即入Ｑ，可見1800米特別擅長。而令方嘉柏連續第二個賽日起孖，佢馬房正式展開新一輪猛烈攻勢。
「糖黐豆」沿途殿後，直路衝至最後百多米才全面撻着，最終險勝「活潑飛揚」短馬頭位，「糖黐豆」鞍上人柏寶今季首度於泥地贏方廐馬，騎練對上一場合作頭馬來自去年10月5日勝出谷草一哩的「皇者拍檔」，距今超過三個月。
方嘉柏說：「『糖黐豆』表現向來準繩，牠今季表現很好，是一匹很易騎的馬，沙田草地、谷草及泥地都可應付，性能很廣泛，希望牠繼續有好表現。」
第二場賽果又係熱頭冷腳，二至四名順序為「活潑飛揚」、「好性格」及「彩利」，四重彩派59萬幾。當中「活潑飛揚」由何澤堯策騎，連贏搭番方嘉柏的「糖黐豆」，變相開出一條過千蚊師徒Q。