中信里昂過年前，例牌會公佈一份風水指數，嚟到今年已經係第23期，除咗估股市嚟緊一年點走，仲會預測埋邊區樓市最旺，今年該行就睇好香港北面嘅物業。
中信里昂話今年正北方有六白武曲星坐鎮，即使人仔跌不停，北京嘅表親都會帶住成噸現金落嚟，上水樓市料持續高溫，沙田同粉嶺亦有運行。相反，港島、機場一帶同西貢係雞年樓市最淡地區，直頭去到「魔爪纏身」級數，特別建議要避開淺水灣同石澳呢兩個南區豪宅區。
恒指方面，該行風水團隊批全年有進賬，但相信走勢唔會一帆風順。大市雞年首季冇方向，不過健康護理股同零售股會造得好啲；第二季電訊同網絡等行業將帶領大市昂首向上，恒指會喺7、8月間見頂。
之後就會進入波動反覆嘅上落市，期間以金融股較佳，至第四季大市會有調整，濠賭股同運輸股最靚仔。整體計全年首選行業有濠賭、可再生能源同運輸。