香港越來越多女馬主出現，其中鄭是鳳及鄧詠琪本身係好朋友，兩人近年開始聯名養馬，今晚沙田泥地賽卒之開花結果。
隸屬吳定強馬房、鄭是鳳及鄧詠琪聯名的「情意相投」，在全港最年輕騎師21歲的莫艾誠胯下，角逐第四場四班泥地1200米，鬥贏雷神座騎大熱門「有禮」開齋，成為首匹勝出的鄧詠琪及鄭是鳳聯名馬，單Win及組合獨贏A2分別派120及40.5元。
鄭是鳳及鄧詠琪之前聯名養過「喜遇知己」及「情投意合」，兩駒均未贏過退役，而「情意相投」曾用過好多唔同騎師都贏唔到，卒之去年尾由徐雨石馬房，轉投與鄭是鳳合作多年的吳定強旗下。
五歲之「情意相投」這晚第三次代表吳定強出賽，續配上仗初騎跑第四的莫艾誠，沿途守第五位，末段加速力唔算特別強，但就逐步追上，卒之鼻位之先及時趕過「有禮」，打開在港勝門，亦帶挈莫艾誠在港首勝泥地賽。
吳定強說：「『情意相投』今場際遇好一點，牠以往情緒容易緊張，今場夠淡定沒有出太多汗，明顯有改善沒有怯場。牠以往呼吸不好，今場綁脷及加交叉鼻箍有正面幫助。『情意相投』每次踩地都好大力，牠喜歡踩鬆軟的場地，泥地很合發揮。」
吳定強憑「情意相投」敲響今季沙田賽事勝鼓，佢目前有六場頭馬，仍排行練馬師榜尾三。第四場二至四名分別為「有禮」、「必搏」及「瀟灑兄弟」，四重彩派二萬二千幾。