雖則話人走茶涼，梁特最後一份施政報告，重要性唔會及得上跑馬仔，但人在江湖，都要畀面撐足全場嘅，之但係梁振英份最後報告要讀成兩粒鐘，中間就算有休息時間都好難頂㗎喎，所以呢，噚日議事廳內個個變咗低頭族，唔係瞓着就係打喊露，八方都覺得情有可原。
好似民建聯黃定光咁吖，早段真係寫字做紀錄㗎，但後尾呢，都敵唔過睡魔's calling；佢哋黨主席李慧琼都意外失守，謹慎嘅琼子罕有放咗隻好大嘅蚊；就連一直傾慕CY嘅元秋，都未能眼仔睩睩含情脈脈望住眼前人，皺眉托腮，苦苦等待一男子完場，人世間最悲慘嘅事，莫過於此嘞。