熱刺呢排個勢好勇，各項賽事七連勝，嚟緊呢輪英超會作客硬撼曼城，小弟都睇好熱刺，因為佢哋嗰種踢法衝擊力強，成隊都跑得，正可以剋制到節奏偏慢嘅曼城。講起熱刺呢隊波，小弟最欣賞嘅球員係中場迪比利（圖），近年一直覺得佢夠料踢大球會，爭吓聯賽冠軍。雖然佢冇走到，但呢兩季熱刺都變成爭標分子。
點解小弟鍾意迪比利？因為佢踢中場中，但季季嘅突破過人數據都好突出，擅長喺球員最密集嘅中路闖出一片天。喺13/14球季，佢場均2.4次成功突破，排英超第八；14/15球季佢就坐後備多，數據較差，但喺15/16球季，佢場均2.9次成功突破，排英超第七。今季，佢仲有進步，場均3.2次成功突破，排到英超第四，亦係熱刺隊內突破最多嘅球員。迪比利嘅特點係球壇中少有，佢唔單止帶波穩，傳波同防守都好好。睇番熱刺今季場均傳球最多嗰六、七個球員，大家都場均傳到50腳左右，大部份人嘅傳球成功率都係百分之八十多啲，但迪比利高過班隊友一截，成功率去到91.5%。
迪比利職業生涯嘅走向有啲似英格蘭名宿史高斯，佢出道踢前鋒同攻中，入波都唔少，但越踢越後，家陣踢box to box中場，同埋睇個勢，佢似向墮後組織者嘅方向發展。迪比利雖然防守位置感麻麻，但勝在唔錫身，肯同對手打埋身波，佢今季場均2.8次成功搶截，喺隊內僅次丹尼路斯，仲好過雲耶馬。最近熱刺改踢3-4-2-1陣式，迪比利兼顧嘅防務更多，因為丹尼路斯似翼多過閘，迪比利成日都要幫佢補位。
文：咖喱