第三場一班1200米係呢晚沙田泥地最高班次賽事，亦係整晚出馬最少一場，但馬少卻鬥得精彩，第一至四名只相距馬頭位。結果田泰安座騎蔡約翰馬房「活力寶」，後上影相險勝連捷，綠燈單Win及組合獨贏A2分別派65及20.5元。
「活力寶」暫時冇報名遠征杜拜，惟本身泥地賽績卻很標青，上次由客串騎師韋紀力於一哩打開泥地勝門，呢鋪雷神試過大閘唔騎，換上田泰安，縮程至1200米再下一城，服役累積五戰泥地兩冠一亞一季，性能良好。
今場跑第二係另一新勝馬「亞馬寶寶」，六歲馬上仗贏谷草最短途1000米，今場改配見習騎師巫顯東受讓十磅，最終輸鼻位影相不敵「活力寶」飲恨做二奶，未能造就小東東首勝夜馬賽事。
「誰可拼」蘇兆輝胯下後上不及跑第三；上仗最大進步馬、初跑泥地的「發盈喜」久休季內初出，放到末段力弱只得梗頸四；四重彩派一萬四千幾。至於大熱門雷神座騎「華美之友」直路中段開始收慢，最終包尾衝線，表現認真麻麻。
「發盈喜」及「誰可拼」均已報名本屆杜拜世界盃嘉年華賽事，前駒一旦成行，將於下月11日先跑一場非大賽的泥地短途，從而爭分以進軍已報跑的泥地大賽。