放假大半年，荷蘭名帥雲高爾宣佈退休。雖然有中國球隊開高薪請佢，但佢話想陪屋企人多啲，所以決定唔再教波。65歲嘅雲高爾贏過好多錦標，稱得上為球壇傳奇；佢亦係教練界笑匠，佢份人真性情，講嘢直腸直肚，金句百出，帶畀球迷好多歡樂。
女婿過身成轉捩點
雲高爾禮拜一獲荷蘭政府頒授終身成就獎，表揚佢對足球嘅貢獻。拎完獎後，佢宣佈退休：「教完曼聯之後，我都諗住唔再教波，但後尾改變主意，放個長假先再講。到家陣，我決定唔再做教練。」雲高爾話有球會向佢開出總值4,500萬鎊（約4.2億港元）嘅三年合約，請佢去中國教波，「中東球會唔會開咁高嘅人工，只有中國球會先出得起。我係可以去，但決定留喺度。我嘅家庭發生咗好多事，當你要面對呢啲事時，自然會作出一個人性嘅決定。」雲高爾其中一個女嘅老公上個月去世，相信呢件事令佢決心放低教鞭，專心陪屋企人。
被譽為教練界笑匠
雲高爾係個帶畀球迷好多回憶嘅人，佢初出道帶領嗰支阿積士，可以話係歐洲球壇史上其中一支最傳奇嘅球隊，差啲就連贏兩屆歐聯。嗰陣雲高爾啲行徑都好出位，例如喺1995年歐聯決賽，佢想投訴AC米蘭嘅迪西里起腳過高，所以就李小龍上身，喺場邊起飛腳，示範畀球證睇。之後雲高爾教過巴塞隆拿、荷蘭同阿爾克馬爾。喺拜仁嗰陣，佢試過當住班球員除褲露鳥。前拜仁前鋒東尼憶述，話雲高爾要證明畀球員睇佢係有ball（睪丸），所以就當眾除褲，東尼話：「太瘋狂嘞！好在我唔喺前排，唔係睇到好多。」
教完拜仁後，雲高爾喺2012年再教荷蘭，最經典嘅係喺2014年世盃幫青黃不接嘅荷蘭贏到季軍，佢被稱為戰術大師。之後雲高爾去咗教曼聯，執莫耶斯嘅爛攤子，嗰兩季佢笑料百出。為咗反擊艾拿迪斯話曼聯係「長傳聯」，佢就喺記者會度派notes澄清；可能英文唔好啦，佢叫曼聯球員要踢「咸濕足球」，又叫錯過基斯史摩寧做米克。仲有，佢對阿仙奴嗰陣場邊示範插水，嗰吓動作被瘋狂改圖，真係笑到我求大俠收唔到聲。因為佢真係乜都敢做，所以香港網民幫佢改咗個花名做「敢帥」。
LvG笑料多︰示範插水
教曼聯嗰陣，雲高爾只係拎咗個英足盃，成績唔算好好，但留傳後世嘅笑料就最多。對阿仙奴時，佢不滿阿歷斯山齊士插水，就喺第四裁判前插一次，示範畀裁判睇，呢一幕紅爆網絡。
LvG笑料多︰神級換人
2014年世盃第一場，雲高爾帶領荷蘭以5:1大炒上屆冠軍西班牙，尹佩斯仲入咗球「魚躍衝頂」嘅金球。八強對哥斯達黎加嗰陣，雲高爾喺完加時前換入門將告魯爾，最後互射12碼贏波入四強，可以話係世盃史上最神級嘅換人。
LvG笑料多︰裸女合照
雲高爾教阿積士嗰陣，同時任燕豪芬教頭艾禾卡特拍咗呢輯咁香艷嘅相，佢兩個着住西裝，道貌岸然，但旁邊就係兩個人體彩繪咗兩隊波衫嘅裸女，張相充滿喜感。
