免費午餐不是夢，噚日Uber位於銅鑼灣嘅新總部向傳媒開放，最大亮點係有特大咖啡廳，每日向員工提供免費早餐，遲吓可能午餐都免費，真係恨死唔少要捱快餐劣食嘅打工仔。
Uber香港區總經理佘雋知（圖）亦有問必答。大家都好關心Uber司機被告非法載客取酬單官司，佘雋知話唔方便多講，但係就話2014年進軍香港，總共已載客100萬人次，司機由最初10個，到𠵱家有3萬個。「唔想食麥當勞都可以食KFC，冇理由只可以搭一種的士！」佘雋知又透露，一直就法例規管Uber問題同政府聯絡，幾個月前重同創科局長楊偉雄見過面。點知Uber見完記者冇耐，楊局長就火速澄清，話只係同佘雋知咁啱出席同一活動，雙方冇傾過立法規管Uber。