今日份施政報告，又係以上帝感召之名搞出來。支持度唔使審，你都估到，super popular！
上帝這一年被抽乾，好鬼dry，好快會感召房屋署那位「唔醒起」的頭頭，關係到鉛水喎，唔係聖水，會議七次，全零記錄。上帝都會嬲嬲豬，即刻留位急召。OMG，人為的悲劇，過去N年，還發生得少嗎？上帝睇化，唔會手軟，反正九龍醫院還有位。
距離上帝感召最近的地方，唔係大潭水塘，唔係富二代包起款待的私竇，而係基層出沒的地區。五年一度，每個想登上權力頂峰的政治生物，紛紛晒冷，公屋棺材房老人中心窮人飯堂，成為親民指定佈景。個個都想頭一個感動到上帝，得上帝眼淚者，得天下。
上帝密密calling，神啊，有冇無限數據plan？漫遊條數超和味，邊位闊佬包底？上帝用的尿袋是否中國造？知道幾時會爆嗎？河套創科園第一炮，就是推出上帝全接觸的超級聯擊機，可以人神合一，玩合法盜版Pokémon Go！
上帝貴庚是否屬雞？全民退保無行了，上帝計劃上樓嗎？西九俾咗故宮無預上帝一份，大浪西鹹田五間丁屋連裝修益你啦。香港勝在有上帝感召。阿們。