兩位特首跑馬仔大熱林鄭月娥同曾俊華都未公佈競選班底陣容，外界繼續收風猜猜猜，而決心打造「香港營」嘅林鄭，確實梁、唐陣營都有人瞓身幫拖，有傳媒仲話，ABC不遺餘力嘅范徐麗泰同林大輝（圖），盛傳都加入林鄭班底。
咦，係咪有人同大輝大師傾過佛偈，令佢頓悟撐林鄭？大輝回覆時話卸任立會議員後，自己仲有幾多政治力量，心中有數（嘩，好謙喎！），仲話能夠同范太及唐唐等重量級人士見報，「感到受寵若驚」！
話對方親自聯絡
大輝大師話作為市民，支持有志為國為港嘅有心有力人士參選特首，期望今次特首選舉有良性競爭，大家比拼政綱、班底同實力。
咁係咪加入競選班底呢？循一席難求嘅政協界別自動當選選委嘅大輝大師不諱言，林鄭本人親自聯絡過佢。至於佢係咪真係加入班底嘞喎……大輝大師會咁易俾大家估到㗎咩？欲知後事如何，且聽下回分解！