一剔正準備喺德國慕尼黑搞個新波砵發佈會，邀請咗五位歐洲主流聯賽射手出席，包括巴黎聖日耳門嘅卡雲尼（右起）、祖雲達斯嘅希古恩、熱刺嘅哈利卡尼、拜仁嘅羅拔利雲度夫斯基之餘，仲有曼聯小將「福仔」拉舒福特，喺呢五位中福仔明顯唔夠班。曼聯球迷始終眾多，但一剔點都要搵啲紅魔鬼球員撐場，但竟然冇邀請隊長朗尼（小圖），反而搵咗福仔，真係有啲意外。福仔有機會搵吓外快都好，事關佢日前揸住六萬鎊嘅德國名車去練習，好衰唔衰就撞咗，雖然人冇事，但整車都要使唔少錢，好彩有商業活動幫補吓。
普巴喺ig向球迷耍冧
講開曼聯，周日雙紅會福仔冇份落場，中場保羅普巴因為輸12碼成為球隊失分罪人，佢喺個人Instagram就留言認錯，「衰嘢有時真係會發生；我已經準備好繼續戰鬥，為下一場做準備，至少我哋冇輸波，真係好感謝支持我嘅人。」