王宗堯上年被模特兒女友黎紀君（Christy）狠飛，點知新一年再次被分手，大前晚開始王宗堯在網上尋人「其實消失係咩玩法呢？」、「First day back！三個月，一些些改變了，有些東西已經返唔到轉頭」，言語之間，疑似同女友蔡潔嘅半年情出現咗問題。
「想當面傾吓」
馮仁昭噚日訪問王宗堯時，提到Instagram留言問「其實消失係咩玩法」，佢話：「總之有啲人唔見咗，唔係好清楚佢去咗邊，冇乜答覆、冇乜回應，暫時唔知乜嘢事，所以睇定啲先！」咁𠵱家同蔡潔係乜嘢關係，佢竟然爆咗一句：「唔係好特別清楚，所以首先要搞清楚件事先。」
宗堯仲用劉青雲、郭藹明夫婦打咗個比喻：「我成日覺得如果你可以好似青雲咁就話，有一個人可以係太空總署，你架飛船飛走咗，做完戲，咁大家有個共識係好嘅，唔知！咁未必一定係得嘅，其實都想當面傾吓，搞清楚件事先嘅。」
𠵱;家唔知蔡潔身在何方，但宗堯好想得到一個答覆：「係乜嘢一回事，自己都係想有個知字。」怕唔怕無疾而終？佢皺一皺眉話：「唔知㗎！唔敢諗太多，暫時好多嘢都係未知數，唔敢做太多假設。」
這邊廂宗堯希望當面講清楚，那邊廂嘅蔡潔接受本報訪問自認分手：「因為工作關係，大家相處同溝通嘅時間都少咗，所以經過呢段時間，我覺得都係專心喺工作方面先。」
撰文：馮仁昭