隔牆有耳：
LEGO蝙蝠俠搞花生騷 - 李八方

八方噚日行過商場，見到大大個蝙蝠俠掛咗喺天花板度，唔通佢近排見香港群魔亂舞，決定由葛咸城搬嚟斬妖除魔？原來嚟緊1月19號至2月16號期間，奧海城搞咗個「LEGO蝙蝠俠時裝展」，全球首度展出9款1.5米高嘅蝙蝠俠私人珍藏造型，好似望落好重口味嘅着住睡袍嘆龍蝦裝、迷人Pink Fairy裝等等，難怪仲有隻成3米高嘅LEGO蝙蝠俠都要親自嚟監場。

雖然全新電影2月先上映，但今次展覽入面會搶先展出用LEGO砌成嘅葛咸城模型，以及各款全新LEGO蝙蝠俠電影系列的樂高產品，將電影精采場面嚟個大晒冷。現場仲有隻用超過2.7萬粒LEGO、花150個鐘頭砌出嚟嘅小丑，淨重83公斤。
而展覽開咗間LEGO蝙蝠俠限定店，喺1月21號會限量發售獨家別注版「阿卡漢瘋人院」，想買嘅記得mark低個日子去搶啦。