71歲嘅滙豐銀行前主席艾爾敦（David Eldon）早於2005年退休，𠵱家仍然幫手擔任中東滙豐銀行主席，滙豐贊助一年一度「亞洲金融論壇」，艾爾敦當然支持，連續兩日現身，噚日亦主持一場討論環節。
佢喺香港生活幾十年，會後有人問佢點睇特首選舉，佢十分精靈，話對特首候選人了解唔多，只係多年前跟曾俊華一齊參加一個trade mission。做特首嘅基本條件，係要對香港整體利益有利，有能力凝聚各界為社會共同努力。
佢睇好香港經濟，指即使政治有不明朗因素，但香港係商業社會，無論邊個出任特首，商業仍會如常運作。講到尾，佢認為，唔應該由一名外國人去評論候選人係咪合適，應留畀香港人自行判斷。