講到明2018年任滿唔再續任，重返醫學院專注癌症研究嘅中大校長沈祖堯，最近接受馬會刊物《駿步人生》訪問，講到年輕人係咪「一代不如一代」？祖堯BB唔係咁諗，佢話只係「一代不同一代」，因為以前識寫copybook、寫九宮格已經叫好叻，𠵱家一、兩歲嘅細路仔已經識得玩iPad，因為社會唔同咗，好難直接比較，但都提醒，網上資訊太片面，係警號，「放張相上網，一小時有一百個like，覺得自己好受歡迎」，咁樣就好易變得自我中心。
「頭痛都冇埋」
唔知係咪社會撕裂太嚴重，令呢位人氣不俗嘅校長學習點樣「下火」？方法原來包括學書法，佢話一個月學一次，每次兩至三小時，覺得書法有助陶冶性情，學咗之後「頭痛都冇埋」。因為書法，佢仲重拾那些年讀過嘅中國詩詞，最like《定風波》嘅「回首向來蕭瑟處，也無風雨也無晴」，唔通就係佢嘅寫照？