新年前夕又係政黨忙碌期，唔少黨派都會開年宵檔賣同時事有關嘅精品。公民黨會喺22日（年廿五）至27日（年三十）一連六日喺維園檔為個黨籌款，余若薇喺攤位為市民寫揮春已經係例牌菜，肯肯定大排長龍。
咁丁酉年又有乜雞年精品好賣呢？呢排跑馬仔成為熱話，明明綠燈轉眼變成紅燈，有啲由冇燈變成爆燈，搞到參選人以至支持者都囉囉攣。公民黨就特別設計神奇出閘紅綠燈，想話畀大家聽，無論最後着乜燈、邊個出閘，大家都係冇份揀，因為根本冇真普選，要求換人亦要換制度。每個68蚊嘅紅綠燈，隨燈附送貼紙一套，畀大家任揀。
而電影《哪一天我們會飛》主題曲其中一句「仍然要相信，這裏會有想像」，振作咗唔少港人，每個138蚊印上歌詞嘅斜揹環保袋，會唔會令大家更守護我城？而余若薇畫嘅山水畫文件夾則每套100蚊。