建築、測量、都市規劃及園境界立法會議員姚松炎，原本喺中大教書，因為傘運踏上從政路，挑戰建制壟斷多時嘅功能組別兼當選埋。原來佢𠵱家咁執着爭取公義，同讀書時一段經歷都有關。
今年53歲嘅姚松炎一家十口，八個小朋友中佢排第七。兩歲搬入美孚新邨，算小康家庭，小學時讀私立英文小學，但佢細細個就諗到如果中學都讀私校，屋企負擔唔少，小五忽發奇想，自己走去轉讀有政府資助嘅小學，方便升中時獲派公立或資助學校。點知因為一直用英文學習，轉校後改用中文上課，完全唔掂，成績一落千丈，到中學派位結果，當然唔太理想。
重考AL拎幾支「火箭」
佢升中後努力讀書，名列前茅，會考成績優異所以原校直升中六，殊不知考A-level考到第二張卷時染上德國麻疹，當時醫生怕佢傳染其他人，要求佢住院，因此錯過兩科考試。
雖則當時醫生安撫佢話有醫生紙可以補考，但實情原來係冇呢個機制，考評局最後將佢同班同學平均分數當作佢嘅成績，結果升唔到大學，讀咗一年高級文憑就決定投身社會工作，喺多個行業打滾過。
直至差唔多30歲時，佢覺得有啲遺憾，決定考多次A-level，結果拎住幾支「火箭」入咗大學。佢笑言：「𠵱家咁想爭公義，可能同當時成績有關，因為（第一次A-level）成績唔係我自己。」