「Oh my God，你邊位？」林太見床邊突然出現一位美男子，忍不住尖叫。她丈夫和兒子正在帝都吸食煙霞，所以都不在身旁。
「我係魔鬼，」他說，揀了最近牆上十字架的櫈子坐下，「你咁大反應，令我好意外。我聽講你好大膽好打得，又天堂留位，又上帝召喚，仲估你唔驚我。」
林太不禁臉紅，只希望他黑暗中看不見，稍一定神，便強裝鎮定地問：「你點證明自己係魔鬼，唔係賊？」
他回答說：「你都冇證明上帝同你講嘢啦，係咪先？不過我好人，你要證明咪畀你囉：Expedit esse Deum et, ut expedit, esse dicamus！明未？」
「阿鬼，你都係講返中文啦。」林太無奈說。
他說：「唉，通常鬼上身嘅人都講拉丁文，所以我咪講句拉丁文證明我係魔鬼囉。林太，就算我唔用中文解，你都一早明白呢句話嘅意思啦，我係話：上帝嘅存在好有用，既然有用，不如我哋就話佢存在啦。」
她眼眶一熱，覺得魔鬼真是知己，終於按捺不住，淚水嘩啦嘩啦的流。
魔鬼起身走近林太，拍拍她的頭，溫柔地說：「跟錯老闆，後果真係好嚴重。上帝出咗名鍾意考驗佢嘅信徒，好似約伯，上帝就由得我瘋狂咁虐待佢。又例如六百年前，有個法國妹叫貞德，就係因為聽咗上帝講，走去同英國佬打仗，結果畀人判埋死刑。上帝叫你去死，唔通你又做咩？你又唔係鬍鬚佬，唔需要always agree with your boss㗎喎。不如你就學吓浮士德，將個靈魂賣畀我，我可以幫你實現所有願望，好唔好？」
林太本來篤信上帝，從未想過魔鬼會上門跟她交易，但現在情況發生重大變化，便決定答允魔鬼要求。魔鬼大喜，連忙草擬契約，此時他的手機響起，原來是地府律師來電。魔鬼聽後，瞬間臉色大變，×一聲就消失了，林太不知所措。
原來律師通知他，乙方靈魂已賣了給共產黨。