一年一度「亞洲金融論壇（AFF）」噚日在港舉行，恒生銀行（011）董事長錢果豐與「梁粉」恒隆（101）主席陳啟宗都有畀面出席聽專題演講，近日人人玩「估領袖」，佢兩位就好醒目，一於封口，避談特首心水。
安聯首席經濟顧問埃利安專程來港，為AFF作專題演講，錢果豐與陳啟宗聽足90分鐘先走。會後，錢果豐好謙咁話，可以向埃利安偷師，至於特首選戰，佢就點到即止，叫「大家理智啲，揀一個最適合香港嘅特首」。
陳啟宗聽完演講就笑到四萬咁，心情幾靚，被傳媒追問佢特首選戰，佢就繼續四萬咁口，笑住走。但由於越來越多人圍住陳啟宗，搞到現場有些少群情洶湧，陳啟宗最後要由四、五名保安護駕下喺特別通道離開。