香港馬壇今年首場四歲馬專屬戰經典一哩賽嚟緊22號就有得睇啦，而呢段時間大家都估估吓究竟邊匹馬會跑、邊匹馬唔跑。
今日（16日）馬會終於揭盅呢場四歲馬系列頭關嘅優先出賽馬匹名單，屆時14匹四歲頂級良駒將會共同爭奪總獎金港幣1,000萬。
驟眼睇，呢場賽事好似只得兩個練馬師大鬥法咁，喺14匹正選馬入面，練馬師大摩出動馬海戰術，用七匹馬圍堵呢項大賽，包括「佳龍駒」、「美麗傳承」、「鷹雄」、「喜蓮彩星」、「明月青天」、「共創更好」及「人民武士」，而一直傳言會上陣的「喜旺寶」則退出。大摩亦係繼12年精英盃後，再次一場賽事派七匹馬出戰。
而另一個大馬房告東尼亦不遑多讓，以焦點馬「巴基之星」領軍，帶領「勁哥兒」、「勝得威」及「綫路勇駒」共四匹賽駒，抗衡大摩的馬海戰術。
現時排行練馬師榜第一位的蔡約翰，旗下實力馬「劍斷浪」已退出經典一哩賽，僅餘「西方快車」參加呢項大賽。另外，沈集成馬房的「四季旺」及何良的「怪獸家長」亦會參戰，惟兩駒皆大幅蝕磅跑。